لو عندك مشكله في الـ Reading وفي فهم معنى الجُمل اللي بتقراها في الـ SAT بشكل عام إقرا الـ post ده كويس جداً وإعمله save عندك عشان ترجعله لو إحتاجته تاني. ولو حضرتك ولي أمر إعمل tag لإبنك وبنتك لإن الكلام ده مهم جداً.
أي جمله بتقراها ليها أبعاد كتير غير مجرد الكلمات. يعني لو قدرت تترجم الكلمات ده مش معناه إنك هاتفهم الجمله وحتى لو فهمتها نسبياً ده مش معناه إنك فهمت كل المقصود منها.
أبعاد أي جمله هي:
1- Diction الكلمات اللي بيستخدمها الكاتب وبيختارها عن قصد عشان يوصّل معنى مُعيّن. زي مثلاً كلمة wander بتدي معنى إن الشخص بيمشي بلا هدف، لكن كلمة march أو head بتدي معنى الحركه تجاه شئ مُحدد. وبالتالي لازم تكون فاهم الفرق بين الكلمات. مش معنى إن القاموس بيقولك إن في كلمتين synonyms إنهم ممكن يتحطو مكان بعض في الجمل بشكل طبيعي.
الحاجه التانيه اللي تخلي بالك منها في الـ diction هي إن الكلمات ٣ أنواع (شرحناهم قبل كده في بوست سابق): نوع معناه ثابت زي كلمة pen مثلاً، ونوع معناه بيتغير حسب السياق اللي بنتعامل معاه زي كلمة form مثلاً (وده اللي بييجي في ال SAT)، ونوع تالت مرتبط بمجالات علميه ومالوش إستخدام برا السياق ده زي كلمة big bang أو natural selection. القاموس مش هايقدر يديك معنى الكلمات بتاعت النوع التاني في حالات كتير، وبالتّالي دورك تستخدم السياق عشان تفهم معاني الكلمات.
2- Grammar وده القواعد اللي بتربط الكلمات ببعض، وهنا لازم تخلي بالك إن فهمك للـ Grammar هايفرق جداً في فهمك للجمل. يعني مثلاً في الـ tenses عندك aspect زي الـ perfect مثلاً دوره يوضّحلك إن في action حصلت قبل التانيه. لو إنت مش فاهم إن اللي حصل الأول بيكون في الـ perfect مش هاتقدر افهم ترتيب الجمله صحّ. وبالتّالي إعتمادك على قاموس مش بيضمنلك فهم صحيح للي مكتوب قدامك.
3- Tone وده الـ attitude بتاع الكاتب في كلامه. هل هو بيدعم فكره ما ولا بينقدها ولا بيسخر منها؟ هل هو عنيف ولا إسلوبه مُسالم وهادي؟ هل مُحايد ولا مُنحاز؟ هل formal ولا informal؟ دي حاجات لازم تكون بتفكر فيها وإنت بتقرا، وبردو القاموس مش هايقولهالك.
4- Rhetoric البلاغه أو التعبيرات اللي فيها تصوير. تخيل مثلاً لو أنا قولت لحد open the doors of your mind، هل هنا تقدر تفهم كلامي بشكل حرفي؟ هل أنا اقصد باب له handle فعلاً وعايزك تقوم تفتحه؟ ولا كلامي هنا المفروض يتفهم على إني بقوله “ركّز” أو “”إنتبه”؟ اللغه مش بتتفهم بشكل حرفي طول الوقت ولازم تخلي بالك من دلالات الكلام كويس.
5- Purpose الهدف من كلامك. ممكن تقول لحد open the door و ممكن تقوله can you please open the door. الهدف في الحالتين واحد، وهو إن الباب يتفتح، بس الـ tone مش واحده والـ Grammar مش واحد. وممكن تقول لواحد جملتين زي open the door و open the door of your mind وهنا تكون الـ tone هي هي والـ Grammar هو هو لكن الـ purpose مختلف تماماً، في الأولى عايز تفتح الباب وفي التانيه عايزه يركز معاك. ف دايماً إسأل نفسك وإنت بتقرا إيه الهدف من العباره دي؟
6- co-text and context الإتنين دول مهمين جداً. الأول الـ co-text هو الكلمات اللي قدامك، يعني لو عندك جمله فيها كلمه مش مفهومه ف الـ co-text هو الكلمات اللي حوالين الكلمه اللي مش مفهومه في الجمله أو الـ paragraph. أما التاني ف هو أوسع شويه وهو الـ context وده مقصود بيه السياق الخارجي للنص، يعني الزمن والمكان والثقافه اللي بيتقال فيها الكلام. لو بنحلل حاجه زي this is interesting مش هانقدر نفهمها بنفس المعنى لو حاولنا نفهمها مره في إنجلترا ومره في أمريكا، لإن أوقات كتير عباره زي دي بتستخدم بشكل sarcastic أو ساخر في إنجلترا بحيث إنك لو قولتها لحد تبقا بتقوله كلامك كلام فارغ أو بمعنى أصح بتتفهم على إنك تقصد I don’t care. وبالتالي فهمك للسياق اللي بتتقال فيه الجمله هايفرق جداً في فهمك للـ tone والـ purpose والـ rhetoric اللي فيها.

عشان نلم الكلام اللي فوق ده كله، مش كفايه انك تمسك dictionary وانت بتذاكر. لازم تفكر في اللي ورا الكلمات، وتتعود تسأل نفسك الأسئله المهمه، هو الكلام ده بيتقال ليه بالكلمات دي تحديداً؟ وليه بالتركيب اللغوي grammatical ده؟ إيه الـ tone بتاعته؟ إيه الهدف منه؟ هل يتفهم بشكل حرفي ولا فيه بُعد بلاغي؟ إيه السياق اللي بيتقال فيه وهل فهمي لمعنى الكلمه يتفق مع الكلمات اللي حواليها ولا لأ؟

تابع موقعنا عشان يوصلك شرح يساعدك في المذاكره وكمان تعرف مواعيد كورسات Mr. John Edward

لحجز الكورس سجل بياناتك في اللينك ده وهانتواصل معاك

http://mrjohnedward.com/book-a-class/

أو إبعت رسالة WhatsApp على 01228081583

Mr. John Edward
Cambridge CELTA Certified English Instructor